Atong Tanaman

Atong tanaman, atong tamnan

2009-03-14T16:47:00.000-07:00

Atong tanaman, atong tamnan

Magdrowing mi sa high school, basakan, bukid, panganod, langgam galupad, maoy handurawan nako sa banika (countryside) sa Pilipinas. Ganahan ko. Unya nakita nako ning hulagway, ug midalikyat og tan-aw balik, bation balik, tagamtamon balik ning akong ganahan nga talan-awon.

Comment by Nippy 8 hours ago
Bitaw nindot kaayo nga magpuyo sa payag ilawom sa kalubihan. Sa matagtutok nako niini nga payag, mura'g taas kaayo akong panglantaw. Pagkahawan sa maong kalubihan, dayon mahanduraw nako ang takna sa udtong tutok nga nanggilingkod mi sa akong mga higala nga naghingut-anay, nag-irok-irok samtang naminaw ug drama nga "Handumanan Sa Usa Ka Awit." :))

Comment by Dagsa 5 hours ago
Nanumbalik ang kagahapon. Matag Sabado , dili magdula kay moadto sa basakan. Magtisok sa similya diha sa gi-ekisan nga lapok.

May namilit pang lapok sa gisiong sapot sa pag-abot sa payag ilawom sa kalubihan nga gihulpan sa mga binuhing manok sa kilomkilom sa usa sa mga adlaw sa suok ning panumdoman nga karon gibuhi pag-usab nianang duha ka hulagway nga imong gipaambit kanamo, Bay Lubi. Daghang salamat.

Tanaman = Kultura

2009-03-13T08:32:00.000-07:00

Nindot nga pasumbingay sa Kultura ang Tanaman. Haom gyod. Kay anaa ang pag-ugma, ang pagtubo,ug paglambo. Diha sa kinaiyahan nanukad. Sama lang nga ang kultura, diha gapanukad sa kalikopan, sa kinaiyahan, ug tali sa pag-ugmad sa tawo o sa pagpulos niya sa kinaiyahan o sa palibot, nahulma o milambo ang iyang kultura. Sama ra gyod sa pagugmad og tanaman, sa pagtanom, pag-alima, mao sad ang kinahanglan nga pag-alima alang sa kalamboan sa Kultura.

Kaugmaran Sa Tanaman

2008-12-19T21:59:00.000-08:00

Matod pa, ang tanaman simbolo usa sa kultura, sa kaugamaran o budaya. Ang tanaman sa Bisaya, nagalambo biya, tungod sa mga bisdak nga nagkugi sa pag-ugmad sa atong kultura. Maayo unta kon modaghan pa gyod ang mga Bisdak nga magkugi sa pagppalambo sa sa inato nga kultura.

Ubay-ubay na ang gasulat og Binisaya diha sa balayan sa Lunsayng Binisaya. Mokabat na kapin 5 ka gatos ang miembro niini.

Sa dagitwanang usab milanog na ang mga awit nga Binisaya, salamat sa kabatan-onan sa ilang gilabyog-labyog nga Bisrock. Ug matag alas 10 sa buntag (Pilipinas), buhi ang pagsibya ni Abay Rolly sa Radyo Bisdak. Mopasundayag pod siya sa iyang mga hinimo nga awit, buhing konserto.

Sa atong katitikan, gapadayon gyod ang Bisaya Magazine sa ilang pagkugi ug paghago sa pagtuboy sa kulturang Bisaya. Silay nag-atiman pod sa paghan-ay sa Batadila Bisaya.

Ang LUDABI nga gadala usab sa bandilang bisaya, sa garbo bisaya, gapadayon. Mahimamat ialng balayan sa ludabi.org

Ang Cebuano Wikipedia usab ubay-ubay na ang contribusyon.

Ang madali nga onlayn nga diksyonaryo sa binisaya.com dako kaayog tabang. Uban pod sa nagkugi sa pagbuhat og mga diksyonaryo

Ang Istorya.net ug ang Bisdakplanet.net tapokanan usab sa mga Bisaya. Ang Kalubihan kalambigitan sa Lunsayng Binisaya, sa mga Bisaya.

Sa nataran sa mga balak ug sugilanon, ang Kabisdak hiposan sa mga balak, sikbit sa Prosalamangka, hiposan sa mga sugilanon.

Daghan pa ang nagkugi sa pag-ugmad, nagbulahan sa tanaman sa Bisaya diha sa ilang mga buhat ug mugna.